.jpg)
Die Hoërskool Menlopark is een van Suid-Afrika se top skole en geleë in die Ooste van Pretoria.
Puik onderwysers en ‘n heerlike skoolgees vind neerslag in ons credo: “ Absolut Menlo”.
Die Hoërskool Menlopark is ’n skool met eietydse tradisies, waarbinne Menlo-manne en Menlo-meisies in volkome gemak lángs mekaar, maar nie ín mekaar se skaduwee nie, ontwikkel en blom. Blom, juis omdat Die Hoërskool Menlopark elke leerder, tydens 5 jaar se ononderhandelbare akademiese toewyding, ’n groot verskeidenheid wyduiteenlopende ontwikkelingsgeleenthede bied (met genoeg ruimte vir gesonde pret en plesier). Na meer as 45 jaar is en bly een van die skool se besondere kenmerke sy “gesin”-struktuur. Warmte, meeleweing met mekaar en die absolute saamstaan op alle gebiede, bind die skool saam tot ‘n hegte gesin.
Die afgeronde en gedissiplineerde jong volwassenes-in-wording wat ons die wêreld instuur is steeds die skool se sterkste handelsmerk. Dit word, onder andere, moontlik gemaak deur ons volgehoue fokus op die daarstelling van ‘n breë en gelaaide spektrum groeipunte vir élke Parkie, in ag genome ook elkeen se unieke persoonlikheid.
Bewese sukses op alle terreine - akademie, kultuur én sport - het geen verdere bekendstelling nodig nie, nóg in Pretoria en onmiddellike omgewing, nóg waar jonk en oud hulle ook al landswyd in gerekende en gerespekteerde geselskap bevind. Die Menlo-familie se besondere hoogtes (ons leuse is nie verniet Excelsa Petamus, streef die hoogste na nie) is geanker in Christelik gefundeerde onderrig binne ’n raamwerk van streng dissipline en ononderhandelbare waardes van integriteit, lojaliteit, respek en ywer.