Menlo Perdesport

Perdesport

Menlo Perdesport, onder die leiding van die kaptein, Renita du Toit, en onder-kaptein Anouk Oosthuizen, is vanjaar geken aan veelsydigheid en ongekenmerkte prestasies.

 

Menlo-Perdesportskou 

Die jaar is afgeskop met die Menlo-Perdesportskou waarin 190 inskrywings deelgeneem het. Hierdie spoggeleentheid is een van die eerste geleenthede in die jaar waar perd en ruiter kans kry om die vakansie af te skud om weer hul drafstap en galop in harmonie te kry. Die ABSOLUT suksesvolle skou is weereens te danke aan borge, ‘n toegewyde reëlingskomitee, diensbare Menlo-leerders, ondersteunende toeskouers, deelnemende ruiters van verskeie skole, laerskole asook hoërskole, en in besonder aan The Burgh Equestrian vir hul gasvryheid en professionele hantering van die dag.

 

SANESA-skoleskoue 

Die Menlo-perdesportskou dien as voorbereiding vir die SANESA-skoleskoue waarin nagenoeg 33 Parkie-ruiters vanjaar in die volgende dissiplines deelgeneem het: Show Jumping, Equitation, In-Hand Utility, Prix Caprilli, Working Riding, Performance Riding, Dressage, Working Hunter, Western Mounted Games en Mounted Archery. Daarbenewens het ruiters ook deelgeneem aan uithouritte.

 

In die eerste kwalifiserende rondte van “Western Mounted Games” het Morgan Brits (gr. 9) en haar perd, Kestrel, reeds beïndruk. Buiten die plekke wat sy behaal het, is sy aangewys as “Overall Champion” in vlak 1 asook in die ope afdeling. Voorts ryg sy volgehou die rosette in en met haar volgehoue prestasies word Morgan verkies tot die SANESA Gauteng-span om aan die SANESA Nasionale Kampioenskappe deel te neem.

 

In die eerste rondte van die SANESA Kernliga ry en spring Parkie-ruiters verskeie plekke los; 16  eerste plekke, 6 tweede plekke en 5 derde plekke. Tydens die tweede, derde en vierde rondtes weerspieël Menlo-ruiters elke keer hul grasie en rol die rosette onverpoosd in.  G’n wonder dat die volgende ruiters, na afloop van die vierde kwalifiserende rondte, in die Gauteng Tshwane span vir die SANESA Kernliga opgeneem is nie:

Mila de Muelenaere, Renita du Toit, Rube van Heerden, Nienke Hennop, Talitha v Rooyen, Zane Coetzee, Yamila van Wyk, Amor Le Roux, Ockert Le Roux v Niekerk, Miecke Pretorius, Maia Nel, Lian van Deventer, Connie du Plessis, Megan Oosthuizen, Karolien Palmer, Lara Coetzer, Carla Petersen, Nina Stone.

 

Vervolgens dring die volgende ruiters verder deur en verwerf kleure om die Gauteng span in die SANESA Nasionale kampioenskappe te verteenwoordig:

Amor Le Roux, Lara Coetzer, Lian van Deventer, Maia Nel, Megan Oosthuizen, Mila de Muelenaere, Rube van Heerden, Yamila van Wyk en Zane Coetzee.

 

Maia Nel eindig onder die Top 10 SANESA Hoërskool ruiters in Gauteng Tshwane! 

 

Die Hoërskool Menlopark eindig vir 2019 tweede in SANESA se Kategorie A skolegroep (skole wat in meer as 35 perd/ruiterkombinasies deelneem), met Hoërskool Garsfontein in die eerste plek en Waterkloof Hoërskool in derde plek.

 

Uithouritte 

Parkie-ruiters beïndruk ook met lang asems en deursettingsvermoë en behaal ook verskeie suksesse met uithouritte. Megan Oosthuizen neem aan 2 uithouritte deel, Lara Bernard neem deel aan die Lormar Uithourit in die Oos-Kaap en voltooi die 80km FEI rit in Springboktyd, waar sy met sekondes tweede eindig. Janike Joubert (gr. 8 kwalifiseer vir die Gauteng ERASA Uithouritspan wat in April in die SAIC Nasionale 120km-Uithouritkampioenskap op Wolmaransstad meegeding het. Tydens die Fauresmith Uithourit kampioenskappe, was Lara en Janike daar om die titaniese stryd waarin 206km oor drie dae afgelê afgelê word, aan te pak.  Janike en haar perd het die ERASA Junior SA Ontwikkelingspan verteenwoordig en het vasgebyt tot die einde om ‘n fenominale vierde plek in die junior afdeling los te ry! Hierdie is voorwaar ‘n uitstekende prestasie. 

 

SANESA Mounted Archery 

Menlo-ruiters het vanjaar geen perke geken nie. Jani Olivier (gr. 10) maak Menlo-geskiedenis toe sy die eerste ruiter is wat ooit namens Menlo deelneem aan die SANESA Mounted Archery. Sy behaal sowaar ook twee eerste plekke! Jani is ook verkies om Gauteng te verteenwoordig in die SANESA Nasionale kampioenskappe.

 

Spanbou 

Met die jaarlikse spanbou, is daar ook tyd gemaak vir nuwe ervarings. Vanjaar het die ruiters skouers geskuur met die vinnigste perde en voorste joggies op Turffontein-renbaan. Menlo-ruiters is bederf met heerlike kos in ‘n privaatlosie en voorkeurtoegang tot die voorskou arena en wennersirkel. Opwinding het kookpunt bereik elke slag as dit gelyk het of een van die Menlo-ruiters se gunsteling perde gaan wen.Die hoogtepunt van die uitstappie was sekerlik die besoek aan die wegspringpunt!

 

Menlo se Opedag 

Parkieruiters bemark ook die sport ywerig by Menlo se Opedag toe voornemende Parkies en sommer baie ander Parkies kom kuier het by ons opedagstalletjie. Die grootste trekpleister was dalk die twee perde harte gesteel het...of dalk was dit die heerlike vars springmielies...of dalk ons oulike ruiters wat so lekker gekuier het met die besoekers. Hoe ookal, Menlo Perdesport sien uit om van krag tot krag te groei.

 

Menlo Perdesport spog nou ook met ‘n nuwe Facebook-blad, waar daar deurlopend verslag gedoen word oor al die jaar se gebeure. Familie en vriende is gevolglik nou altyd op hoogte van Menlo ruiters se deelname en prestasies.