Menlo Redenaars

Menlo-redenaars

Menlo kan redeneer! Ons skop elke jaar met ‘n interne redenaarsuitdunne af waaraan almal wat hou van praat kan kom deelneem. Ons sprekers neem jaarliks aan die Van Huyssteens Oratorsfees se onvoorbereide kompetisie in drie afdelings, nl. Afrikaans, Engels en Tweetalig in spanne, maar ook individueel deel. In 2019 dring 12 van ons sprekers deur na die gala-aand en kom ons huis toe met 5 wenners in die onderskeie afdelings. 9 spanne dring ook deur na die gala-aand en een van ons spanne praat ‘n 1ste plek los. Verskeie toekennings vir die beste spanredenaars en individuele wenners kom gereeld na ons kant toe, want ons sê ons sê!

Ons neem ook deel aan die ATKV-redenaars  waar ons jaarliks in die junior- en seniorafdeling met talle redenaars na die halfeindrondte deurdring, asook na die ATKV-Nasionale finale rondte. In 2019 neem 5 van ons redenaars aan die ATKV –finaal deel. Karmen Wiid word vereer vir die beste taalgebruik in die senior onvoorbereide afdeling en behaal ‘n algehele 4de plek. Dibah Motileni behaal ‘n algehele 2de plek en wen die taalprys vir Afrikaans Addisionele Taal. 

Die redenaars neem in die onvoorbereide en voorbereide afdelings van die Radikale Redenaars deel. In 2019 word ‘n Menlo-man vir die 3de keer aangewys as nasionale wenner van hierdie redenaarskompetisie. Twee junior leerders praat elkeen ‘n tweede plek los in die Afrikaans huistaal afdeling en die Afrikaans addisionele taal afdeling.

 

Menlo-mense mag maar praat!