Die Hoërskool Menlopark

Menlo-Wetenskap skitter jaarliks met absolut uitnemende matriekuitslae!

Leerlinge by Die Hoërskool Menlopark is gedrewe, entoesiasties en gemotiveerd om te presteer op akademiese, sport en kultuurgebiede.

Wat `n voorreg om met Menloparkers met bogenoemde eienskappe in die Fisiese- en Lewenswetenskapklasse te hê. Leerlinge motiveer mekaar, stimuleer mekaar met kreatiewe vrae en antwoorde en ondersteun mekaar tot volgehoue prestasie. Uitstekende uitslae van bo 70% die afgelope aantal jare, getuig hiervan.

Lesse word aangebied met die nuutste hulpmiddels, onder andere uitstekende “Power point aanbiedings”, modelle en video’s wat van die internet afgetrek word, ens. Lesse kan ook aan leerlinge ge-epos word, wat hersiening baie vergemaklik.

Die Departement  Fisiese- en Lewenswetenskap doen sy leuse “Waar wenners wenners word”, gestand op kurrikulêre sowel as buite-kurrikulêre vlak. Lewenswetenskappe in graad 12 (2013) het gespog met die hoogste gemiddeld in die distrik. Jeandré Griessel was die leerling met die hoogste gemiddeld (97%) in Lewenswetenskap in die distrik. In Fisiese Wetenskap het 2 leerlinge `n gemiddeld van 97% behaal: voorwaar `n uitsonderlike prestasie.

By Die Hoërskool Menlopark neem ongeveer  60% van ons leerlinge  Fisiese Wetenskap in gr.10 tot 12.  Uitstekende onderrig en volgehoue betrokkenheid van die personeel by elke leerling waarborg sukses.  Fisiese Wetenskapklasse in die VOO-fase word beperk tot 20 – 24 leerlinge per klas om ook individuele aandag in klastyd te skep. Uitslae van die afgelope aantal jare is `n bewys van die sukses wat met hierdie strategie behaal word:

2010:  53 onderskeidings uit `n totaal van 130 leerlinge, met `n graadgemiddeld van 74%;2011:  60 onderskeidings uit `n totaal van 128 leerlinge, met `n graadgemiddeld van 76%.  Ons word ook aangewys as die topptresteerder in die Tshwane-Suiddistrik; 2012:  47 onderskeidings uit `n totaal van 155 leerlinge, met `n graadgemiddeld van 72%; 2013:  44 onderskeidings uit `n totaal van 153 leerlinge, met `n graadgemiddeld van 70%; 2014:  51 onderskeidings uit `n totaal van 153 leerlinge, met `n graadgemiddeld van 69%. Beste uitslae in die distrik-toekenning; 2015:  50 onderskeidings uit `n totaal van 153 leerlinge, met `n graadgemiddeld van 68%.

 

Die Lewenswetenskappe het die afgelope aantal jare ook puik prestasies gelewer en is die afgelope 6 jaar twee maal aangewys as die beste presterende hoërskool in die Tswhane-Suid distrik.

2008:  38 onderskeidings met `n gemiddeld van 73%;2009:  22 onderskeidings met `n gemiddeld van 70%; 2010:  53 onderskeidings met `n gemiddeld van 75% (word aangewys as die toppresteerder in die Tshwane-Suiddistrik)
2011:  34 onderskeidings met `n gemiddeld van 75%;2012:  33 onderskeidings met `n gemiddeld van 74%; 2013:  42 onderskeidings met `n gemiddeld van 76% (word weer eens aangewys as die toppresteerder in die Tshwane-Suiddistrik). 2014:  41 onderskeidings met `n gemiddeld van 75,7%. 2015:  33 onderskeidings met `n  gemiddeld van 72,4%.                                                                                                                                                 

 

UP with Science

Die Universiteit van Pretoria (UP) bied Up with Science vir wetenskap-entoesiaste aan. Gaan loer by www.upwithscience.up.ac.za of e-pos Hierdie e-posadres word van Spambotte beskerm. Jy moet JavaScript ontsper om dit te lees.

"UP with Science" is `n verrykingsprogram wat deur die Universiteit van Pretoria aangebied word vir hoërskoolleerlinge van die groter Pretoria. Slegs 50 gr. 10 leerlinge word jaarliks vir die program, wat oor 3 jaar strek, gekeur.
Om in die program ingesluit te word, geld die volgende kriteria: Die kandidaat moet akademies presteer in Wiskunde en Fisiese Wetenskap, moet `n belangstelling in die veld hê, moet deur `n onderwyser aanbeveel word en moet `n opstel skryf waarin hy/sy meld hoekom hy/sy graag aan die program sou wou deelneem.
Die projek sluit Saterdag-byeenkomste een maal per maand in, asook `n projekweek wat jaarliks bygewoon moet word.

Na suksesvolle voltooiing van die program, kwalifiseer leerlinge wat by UP inskryf vir studierigtings in die Natuur- of Landbouwetenskappe, vir `n beurs.
Elke skool mag jaarliks slegs 2 gr.10 leerlinge nomineer. Slegs een leerling en in uitsonderlike gevalle, 2 leerlinge, word vir die program gekies.
Die besondere prestasie het ons weer eens te beurt geval dat beide die leerlinge wat genomineer is, tot die program toegelaat is.