Akademie is by Die Hoërskool Menlopark `n absolute prioriteit. Die aanstelling van goed gekwalifiseerde personeel word met groot erns bejeën. Die balans tussen ervare en dinamiese jong personeel word gehandhaaf. Die Hoërskool Menlopark plaas sy fokus op akademiese gebied in besonder op die indril van basiese vaardighede (lees-, skryf- en syfer-vaardigheid) en bereik, deur middel van kontinue akademiese verryking en die mees moderne onderrigtegnieke, die hoogste prestasies:
- ‘n 100%-slaagsyfer
- Top 10 provinsiale presteerders
- Jaarliks een van die Top 3 akademiese skole in Gauteng (in die groep skole met meer as 200 gr 12’s)
- Menlo-Wetenskap: nasionale ekspo-sterre.
- Menlo-Wiskunde: lid van die elite Klub100.
- Menlo-Afrikaans-Olimpiade & Afrikaans-Ekspo: nasionale wenners
- English Olympiad: Top 10 nasionale presteerders
- Nasionale top uitruilskool met FSA-uitruil na Duitsland (reeds afgelope 5 jaar)
Hierdie word in plek gekry deur
- Verryking in elke vak wat ononderhandelbaar is en ‘n Verrykingsakademie
- Engels huistaalonderrig vanaf graad 8
- Die Leeslaboratorium (verpligte gr 8- en gr 9-leesprogram ingebou in die rooster)
- Die Taallaboratorium met 40 oorfone en luisterstasies
- Elke klaskamer is toegerus met dataprojektors en interaktiewe witborde
- Internet-toegang in elke klas
- 4 IT-sentrums en ‘n restaurant met weeklikse restaurantaande.
- Jaarlikse Duitse uitruilprogramme en Franse toere elke tweede jaar.
- 5 Verrykingsvakke vir gr 8 (EEN word gekies): Duits, Frans, Musiek, Entrepreneuriese Wetenskappe en Sportkunde (met spesialisering in netbal, hokkie, rugby of krieket).
Leerders word nie net begelei om uitstekende gr. 12-uitslae te behaal nie (kyk gerus die vingerdruk: matriekuitslae). Vanaf graad 8 is net die beste akademiese onderrig vir ons leerders goed genoeg, sonder om die kind as totaliteit uit die oog te verloor. Oorbrugging van gr 7 na gr 8 word subtiel hanteer in die eerste kwartaal van die gr 8 jaar. Oorbrugging aan die einde van gr 9 vir gr 10-vakke is ook ‘n jaarlikse instelling.
Leerders word reeds vanaf die begin van hulle graad 8 jaar begelei om gereeld te studeer, deurdat daar gereeld klastoetse en geskeduleerde kwartaaltoetse geskryf word. Die datums vir kwartaaltoetse is in die skool se dagboek (Werkplan) en ook op die webblad aangedui. Verskillende assesseringsmetodes word gebruik, om leerders die geleentheid te gee om maksimaal te presteer en sodoende word in ‘n kits ‘n baie goeie beeld van elke leerder opgebou.
Veral junior leerders word ook voorsien van die sogenaamde “veiligvoel-briefies”, waar werkafbakening gedoen word voor `n kwartaaltoets of eksamen, om leerders met voorbereiding te help.
Daar word gewaak teen verkwisting van akademiese tyd, deurdat daar slegs in uitsonderlike gevalle afgewyk word van die akademiese program en periodelengtes. Ouers word ook aangemoedig om dokters- en ander afsprake na skool te reël, om te voorkom dat leerders kosbare akademiese tyd verloor.
- Die leerders in Die Hoërskool Menlopark is geregtig op individuele aandag.
- Klasgroottes word dus beperk tot maksimum van ongeveer 33 leerders (juniors), hoewel die meeste senior klasse aan die orde van 25 leerders elk is.
- Klasgroottes word wel deur keusevakke beïnvloed.
- Die personeel is ook daartoe verbind om sover moontlik eksta klasse aan te bied waar leerders dit nodig het.
Die akademiese prestasie van al die leerders (graad 8 tot graad 12) word gemonitor deurdat alle vraestelle deur ervare senior personeel gemode-reer word, toets- en eksamengemiddeldes met dié van vorige jare verge-lyk word en onderpresteerders betyds geïdentifiseer word.
Die personeel streef daarna om leerders aan die einde van graad 12 die wêreld in te stuur wat nasionaal en internasionaal kompeterend kan wees op akademiese, sosiale en emosionele vlak.